Teen Romance - Sharing of lovely moments
Ni Oliver P. Flores


Sa akong pamatyag sa akong kaugalingon, morag nagpautawutaw ko sa kahanginan ug naa sa taliwala sa paraiso. Unsaon, si Januar ang labi kong suod nga amigo. Kauban kami sa klase sa gieskuwelahan namo sa elementary. Magkuyog gyud kami sa pagpaingon sa eskuwelahan ug sa among pagpauli.

Nakahilak gain ko pag-ayo sa pagbalhin sa nilag puyo sa Ormoc kaniadto. Pero nakasabot na ko dihang duna na koy hustong panghunahuna. Di kabalibaran ang trabaho didto ni Noy Ramon nga amahan ni Januar. Usa gud siya ka branch manager sa usa ka banko didto?

“Ganinang hapon pa sila nangabot, Grace.”
Nakatan-aw ko kang Papa. Nakita ko nga nalipay sa siya. Suod kaayong managhigala sa Papa ug si Noy Ramon. Si mama sab suod sa inahan ni Januar nga si Nang Shierly. Usa ka business woman si Nang Shirely. Nag-buy and sell og mga alahas. Sa laktod, mayo ang pagkabutang nila ni Januar ug duha ra sab silang magsuon. Si Januar ang kamaguwangan.

“Nangita gain to si January nimo, Grace. Sa USC siya motransfer og eskwela.”

Nakita ko nga malipayon sab si Mama. Nakasabot ko sa feeling sa akong parents. Gusto sab nila nga mobalik nag puyo si Noy Ramon ug Nang Shierly sa ilang balay. Ang concrete fence lang ang nag-uwang sa tagsa-tagsa namo ka balay.

Morag milupad ang akong imahinasyon. Unsa kaha ang hitsura ni Januar ron? Guwapo kaha siya, o batig nawong. Nge! Unsaon na lang kon batig nawong ? Hilom kong nakakatawa. Unsa man say labot nako kon unsa ang iyang hitsura?

Friendnako siya. Di nako siya ikauwaw, bisan ngadto sa akong boyfriend, Ipaila gihapon nako siya kang Ramwell. Kon hitsura ang hisgotan, sus, di mabentahaan si Ramwell, Guwapo, dunay hustong gitas-on, nindot og lawas ang akong boyfriend. Gani, magselos man ko usahay. Unsaon, duulon siyag nako, pero morag puparehas lang kamig edad nga tan-awon kay puti man siya, samtang ako morena og pamanit.

Nakahuman na siyag eskuwela sa Political Science. Nagkuha siyag Law course karon sa UP, Lahug.

“Sige, ma, Pa, mosulod na ko sa akong kwarto. Di na lang ko manihapon, busog ko. Medyo daghan ang akong nakaon sa among pagpanihapon ni Ramwell sa uptown.”

Bisagnaghigda na ko ug mingaw na ang sulod sa among balay kay nangatulog na si Mama ug Papa niadto tungura, nagmata gihapon ko ug si Januar ang akong gihunahuna.